भोलिबाट पोखरा प्रिमियर लिग खेल सुरु हुँदै

नेपालकै सुन्दर नगरी पोखरामा भोलिबाट पोखरा प्रिमियर लिग खेल सुरु हुन गईरहेको छ । पोखरा रंगशालामा कार्तिक ९ देखि शुुरु हुुन गईरहेको क्रिकेट टि–२० को उद्घाटन खेल घरेलु टोली पोखरा पल्टन र बिराटनगर टाइटनबीच हुन गइरहेको छ । कात्तिक २० गतेसम्म चल्ने प्रतियोगिताको सबै तयारी पुरा भएको छ । प्रतियोगिताका लागि फ्रेञ्चाइज टिमहरु पोखरा पल्टन, बुटवल ब्लास्टर, चितवन राइनोज, विराटनगर टाइटन्स, काठमाडौं रोयल्स र धनगढी ब्लुज पोखरा आइसकेका हुन् । प्रतियोगितामा सहभागी सबै आफ्नो लक्ष्य च्याम्पियन बन्नु भएको बताएका छन् । क्विन्स इभेण्ट म्यानेजमेन्ट प्रालिको आयोजनामा शुक्रबार देखि शुरु हुने पिपिएलको विजेताले २७ लाख नगद पुरस्कार पाउने छ । जुन नेपालको इतिहासमा क्रिकेटमा सवार्धिक पुरस्कार राशी समेत हो । उपविजेताले १० लाख रुपैयाँ पाउने छ । म्यान अफ सिरिज, व्याट्सम्यान र बलरले सुजुकीको मोटरसाईकल पाउने छन् । प्रत्येक विजेता टिमले बोनस स्वरुप १५ हजार रुपैयाँ प्राप्त गर्ने छ ।
शुक्रबार पोखरा रंगशालाको क्रिकेट मैदानमा हुने प्रतियोगितामा उद्घाटन खेल पोखरा पल्टन र विराटनगर टाईटन बीच दिउँसो १ बजे शुरु हुने आयोजकले जनाएको छ । त्यसभन्दा अघि उद्घाटन समारोह हुने छ । शुक्रबार एउटा मात्रै खेल हुने छ भने शनिबारदेखि दुईवटा खेल सञ्चालन हुने छ ।