बागबजार चर्च कप सम्पन्नः मारानाथा विजयी

लाईट न्युज संवाददाता
पोखरा, १० बैशाख २०७९ । पहिलो बागबजार चर्च कप ईन्टर चर्च 7A साईड फुटबल प्रतियोगिता–२०८० को उपाधी मारानाथा चर्च कस्केरीले जितेको छ । शनिवार भएको फाइनल खेलमा आयोजक बागबजार चर्च टिमलाई २–० गोलको अन्तरले हराउँदै मारानाथा बिजयी भएको हो । मारानाथाको जितको लागि राकेश राई र बिनय तामाङले समान १/१ गोल गरे । जितसँगै मारानाथा चर्चले नगद ६५ हजार, ट्रफी, मेडल र प्रमाणपत्र प्राप्त गरेको छ । विगत केही वर्षदेखि निरन्तर फुटबलमा अगाडी बढीरहेको मारानाथाको यो ११ औँ पटक जित हो । खेलमा उप–विजेत बनेको बागबजार चर्चले गोल गर्ने निकै राम्रो अवसरहरु सिर्जना गरेतापनि कुनै गोल गर्न सकेन । उपविजेता समुह बागबजारले नगद रु ३५ हजार ट्रफी, मेडल र प्रमाणपत्र प्राप्त गरेको छ ।

प्रतियोगितामा मारानाथाका राकेश राई बेस्ट प्लेयर घोषित भए भने बागबजारका आमोस तामाङ बेस्ट मिडफिल्डर, बागबजारका अस्विन गुरुङ बेस्ट डिफेन्स, मारानाथाका अन्जान क्षेत्रीले बेस्ट किपरको उपाधी प्राप्त गरे । त्यसैगरी बागबजारका आशिष गुरुङ प्रतियोगिताका हाई स्कोरर रहे र फेयर प्ले टिमको उपाधी नेपाल बेथेस्दा चर्चले प्राप्त गर्यो । प्रतियोगिहरुलाई पुरस्कार समापन कार्यक्रमका प्रमुख अतिथि पो.म.न.पा वडा नं १ का वडाध्यक्ष साहारा प्रधान र विशेष अतिथि वडा प्रहरी कार्यालय वगरका प्रमुख इन्सपेक्टर शालिकराम तिमिल्सिेनाको बाहुलीबाट प्रदान गरियो ।

स्व.पाष्टर हरि बहादुर थापा र स्व.पाष्टर बसन्त थापाको सम्झनामा बाग बजार स्पोर्टस फेलोसिपको आयोजनामा बैशाख ६ देखि ९ गते सम्म सञ्चालन भएको प्रतियोगितामा १७ चर्च टिमले सहभागी भएका थिए ।