लिभरपुलमाथि बार्सिलोनाको फराकिलो जित, मेस्सीको जादुयी फ्रिकिक
एजेन्सी । च्याम्पियन्स लिग फुटबल खेल अन्तर्गत बुधबार बार्सिलोनाले लिभरपुललाई सेमिफाइनलको पहिलो लेगमा फराकिलो अन्तरले पराजित गरेको छ । फरवार्ड लियोनेल मेस्सी र लुइस सुआरेजले उत्कृष्ट खेल पस्केपछि बार्सिलोना ३–० गोलले विजयी भयो ।
खेलको २६ औँ मिनेटमा सुआरेजले घरेलु टोली बार्सिलोनालाई अग्रता दिलाएका थिए । उनले जोर्डि अल्बाको लो क्रसलाई पोस्टको दिशा दिँदै गोल गर्न सफल भए । लिभरपुलले पनि पहिलो हाफमा बराबरीको अवसर पाएको थियो तर गोलरक्षक टेर स्टेगन त्यसमा बाधक बनिरहे ।
दोस्रो हाफमा बार्सिलोनाका कप्तान मेस्सीले दुई गोल थपे । सुआरेजको प्रहार पोस्टमा लागेर फर्केपछि ७५ औँ मिनेटमा मेस्सीले अग्रता दोब्बर पारे । त्यसको ७ मिनेटपछि मेस्सीले झन्डै ३० यार्ड टाढाबाट उत्कृष्ट फ्रिकिकमा सिधै गोल गर्दै फराकिलो जित पक्का गरे । अन्तिम समयमा लिभरपुलका मोहमद सलाहको प्रहार पोस्टमा लागेर फर्केपछि लिभरपुल ३–० ले नै पराजित भयो ।
दोस्रो लेगको खेल अर्को साता लिभरपुलको मैदान एन्फिल्डमा हुनेछ ।
