च्याम्पियन्स लिग : बार्सिलोना र लियोनको खेल गोलरहित बराबरी
एजेन्सी । फ्रान्सेली क्लब लियोनका गोलरक्षक एन्थोनी लोपेसको उत्कृष्ट प्रदर्शनसँगै यूईएफए च्याम्पियन्स लिगअन्तर्गत राउन्ड अफ १६ को पहिलो लेगमा बार्सिलोना गोलरहित बराबरीमा रोकिएको छ । स्टार खेलाडीले भरिएको बार्सिलोनाले खेल अवधिभर २५ अवसर सिर्जना गरेपनि त्यसमा गोलरक्षक लोपेस बाधक बनिरहे । खेलको सुरुवाती समयदेखि नै अवसर पाएको बार्सिलोनाका लागि लियोनेल मेसी, लुइस सुआरेज, फिलिपे कोउटिन्हो, ओस्मान डेमबेले लगायतले अवसर चुकाए ।
बार्सिलोनाको पछिल्लो ५ खेलमा यो चौथो बराबरी नतिजा हो । च्याम्पियन्स लिगको नकआउट चरणका अवे खेलमा बार्सिलोनाले जित दर्ता गर्न नसकेको यो लगातार छैटौं पटक हो । लियोनले भने सातौं प्रयासमा पनि बार्सिलोनालाई पराजित गर्न सकेन ।दोस्रो लेगको खेल मार्च १३ मा क्याम्प नोउमा हुनेछ ।
