नेपाल टेलिकम र एनसेललाई फाइभजी परीक्षणका लागि फ्रिक्वेन्स दिइने
काठमाण्डौ, मंसिर १४ गते । फाइभजी सेवाको परीक्षणका लागि दूरसञ्चार कम्पनीहरुलाई फ्रिक्वेन्सी उपलब्ध गराउने भएको छ । नियामक नेपाल दूरसञ्चार प्राधिकरणले नेपाल टेलिकम र एनसेललाई फाइभजी परीक्षणका लागि फ्रिक्वेन्सी दिन आवश्यक प्रक्रिया अगाडि बढाएको हो ।नेपाल दूरसञ्चार प्राधिकरणका अनुसार यसअघि नै फ्रिक्वेन्सी नीति निर्धारण समितिमा फाइभजी परीक्षणका लागि निःशुल्क रुपमा सेवा प्रदायकलाई फ्रिक्वेन्सी उपलब्ध गराउन पाउने गरी फ्रिक्वेन्सी नीति निर्धारण समितिमा प्रस्ताव पठाइसकेको छ ।
यसरी निःशुल्क रुपमा प्राप्त फ्रिक्वेन्सीमा फाइभजी सेवा परीक्षण गर्दा सेवाप्रदायकले समेत ग्राहकबाट शुल्क लिन नपाउने प्राधिकरणको प्रस्ताव रहेको छ ।जसमा फ्रिक्वेन्सी नीतिले यसअघि नै दूरसञ्चार सेवाका लागि निर्धारण गरेका ब्याण्डको फ्रिक्वेन्सी परीक्षणका लागि दिन सकिने उल्लेख छ । दूरसञ्चार सेवाको रेडियो फ्रिक्वेन्सी ९बाँडफाँड तथा मूल्य० सम्बन्धी नीति, २०६९ ले ८०० मेगाहर्ज, ९०० मेगाहर्ज, १८०० मेगाहर्ज, २१०० मेगाहर्ज, २३०० मेगाहर्ज, २६०० मेगाहर्ज र १९०० मेगाहर्ज ब्याण्डको फ्रिक्वेन्सी निर्धारण गरेको छ ।
यद्यपि सञ्चार तथा सूचना प्रविधि मन्त्री अध्यक्ष रहने नीति निर्धारण समितिले भने हालसमम्म यस विषयमा कुनै निर्णय भने गरिसकेको छैन । समितिबाट आवश्यक स्वीकृति आएको खण्डमा तत्कालै सेवा प्रदायकलाई फाइभजी सेवा परीक्षणका लागि फ्रिक्वेन्सी उपलब्ध गराउने प्राधिकरणको तयारी छ ।नेपाल टेलिकमले चालू फोरजी विस्तार परियोजना अन्तर्गत मुख्य सहरहरुमा फाइभजी प्रविधि परीक्षण गर्ने गरी यसअघि नै ठेकेदार कम्पनीसँग सम्झौता गरिसकेको छ । टेलिकमका अनुसार फ्रिक्वेन्सी प्राप्त भएको खण्डमा योजनाअनुसार फाइभजी परीक्षणको कार्य अगाडि बढाइनेछ ।
त्यसो त हालै मात्र सञ्चार तथा सूचना प्रविधि मन्त्रालयले फाइभजी प्रविधिका लागि उपयुक्त फ्रिक्वेन्सी पहिचान तथा सिफारिस गर्न भन्दै विशेष प्राविधिक समिति समेत गठन गरेको छ ।
