पोखरामा ठूलो परिणाममा लागुऔषध सहित ५ जना पक्राउ
पोखरा, असोज १९ । जिल्ला प्रहरी कार्यालय कास्की तथा वडा प्रहरी कार्यालय बगरको टोलीले पोखरामा ठूलो मात्रामा गाँजा लगायतका विभिन्न लागुऔषध सहित ५ जना पक्राउ गरेको छ।
पक्राउ पर्नेमा पोखरा महानगरपालिका १६ जोगमणीका २१ वर्षीय समीर गुरुङ, सोही स्थानका २१ वर्षीय अथित गुरुङ, पोखरा १६ बाटुलेचौरका २४ वर्षीय मोहित खवास, पोखरा १९ का १८ वर्षीय मनोज विक तथा धादिङको सुनौलाबजार ६ स्थायी घर भइ पोखरा १६ जोगमणी बस्दै आएका ३० वर्षीय कुमार ठकुरी रहेका छन् ।
चेकजाँचका क्रममा उनीहरुलाई प्रहरीले पोखरा १६ तम्केस्थित बाटोमा हिंडिरहेको अवस्थामा शनिबार साढे ५ बजेको समयमा पक्राउ गरेको हो । प्रहरीले पक्राउ परेकाहरुबाट डाइजापाम ७ एम्पुल, फेनेरागन ७ एम्पुल, बुर्फिन ७ एम्पुल गरेर २१ एम्पुल तथा गाँजा १ किलो २ सय २३ ग्राम समेत बरामद गरेको छ । पक्राउ परेकाहरुलाई लागुऔषध नियन्त्रण ऐन २०३३ विपरीतको कसुर अन्तरगत जिल्ला अदालत कास्कीबाट ७ दिनको म्याद थपेर थप अनुसन्धान भइरहेको प्रहरीले जानकारी दिएको छ ।
