नेपालमा एकैदिन अहिलेसम्मकै धेरै १ हजार ४५४ जनामा कोरोना सङ्क्रमण
पोखरा, भदौ २६ । पछिल्लो परिक्षणमा नेपालमा २४ घण्टामा एक हजार चार सय ५४ जनामा कोरोना भाइरसको सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । यो अहिलेसम्मकै एकैदिनमा हुने संक्रमण संख्यामा उच्च संख्या हो । यो संगै नेपालमा कुल संक्रमित संख्या ५१ हजार नौ सय १९ पुगेको छ । यस्तै गएको २४ घण्टामा नौ सय ७२ जना कोरोना सङ्क्रमित निको भएर घर फर्किएसँगै डिस्चार्ज हुनेको सङ्ख्या ३६ हजार ६ सय ७२ पुगेको छ ।
अब नेपालमा १४ हजार नौ सय २५ जना सक्रिय सङ्क्रमित आइसोलेशनमा रहेका छन् । तीमध्ये एक सय ७० जना आईसीयू र २५ जनाको भेन्टिलेटरमा उपचार भइरहेको छ । यस्तै ६ हजार ७८ जना क्वरेण्टीनमा रहेको मन्त्रालयले जनाएको छ ।
यस्तै गएको २४ घण्टामा कोरोनाको कारण पाँच जनाको ज्यान गएको छ । कोरोना सङ्क्रमणबाट नेपालमा ज्यान गुमाउनेको कुल सङ्ख्या तीन सय २२ पुगेको छ ।
