आज नेपालमा कोरोना संक्रमितको संख्या दिनमै एकहजार नाघ्यो
पोखरा, भदौ ११। स्वास्थ्य तथा जनसङ्ख्या मन्त्रालयले दैनिक प्रेस ब्रिफिङको क्रममा पछिल्लो २४ घण्टामा नेपालमा एकहजार १११ कोरोना सङ्क्रमित थपिएको जानकारी दिएको छ । १२ हजार ६२९ जनाको आरटी पीसीआर परीक्षणबाट आएको नतिजाबमोजिम एकहजार १११ जनामा सङ्क्रमणको पुष्टि भएको हो । योसँगै सङ्क्रमित हुने कुल ३५ हजार ५२९ पुगेको छ । संक्रमित हुनेमा ३३४ महिला र ७७७ जना पुरुष रहेका छन । नेपालमा अहिले सक्रिय सङ्क्रमितहरु १५ हजार २७३ रहेका छन् । होम आइसोलेसनमा छहजार २१० र संस्थागत आइसोलेसनमा नौहजार ६३ रहेका छन् । त्यस्तै आइसीयूमा १४९ जना र भेन्टिलेटरमा १७ जना छन ।
पछिल्लो २४ घण्टामा ५६९ जना कोरोना सङ्क्रमित निको भएर घर फर्केका छन् । योसँगै कुल निको हुने दर ५६ प्रतिशतमा झरेको छ । कुल डिस्चार्ज भएकाहरु २० हजार ७३ पुगेको छ । २४ घण्टामा सङ्क्रमित पाँच महिलासहित आठजनाको मृत्यु भएको छ । योसँगै नेपालमा मृत्यु हुने एकसय ८३ पुगेको छ । नेपालमा कुल सङ्क्रमितको अनुपातमा मृत्यु हुने प्रतिशत शुन्य दशमलब ५२ प्रतिशत रहेको स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले बताउनुभयो ।
