बार्सिलोना कोपा डेल रे को अन्तिम १६ मा
एजेन्सी – बार्सिलोनाले कल्चरल लिओनेसालाई फराकिलो अन्तरमा जित हात पार्दे कोपा डेल रे को अन्तिम १६ मा स्थान बनाएको छ ।
बुधबार राती भएको खेलमा बार्सिलोनाले घरेलु मैदानमा ४–१ को जित निकालेको हो । यससँगै प्रतियोगिताको साविक विजेता बार्सिलोना समग्रमा ५–१ ले विजयी हुँदै दोस्रो चरणमा पुगेको छ । बार्सिलोनाको जितमा डेनिस सुआरेजले दुई गोल गरे । उनलाई विङ्गरद्वय माल्कम र मुनिर एल हद्ददीले १–१ गोल गरेर साथ दिए ।
प्रशिक्षक एर्नेस्टो भालभेर्डेले दोस्रो रोजाईको खेलाडी उतार्दै यस खेलका लागि नियमित टोलीका नेल्सन सेमेडो र इभान राकीटिचलाई मात्र सुरुवाती रोजाइमा राखेका थिए । राकीटिचले सिजनकै उत्कृष्ट प्रदर्शन गर्ने क्रममा तीन असिस्ट दिए । उनले मुनिरले गरेको पहिलो गोलका लागि सुआरेजसँग सुन्दर वन टु पास खेल्दै अन्तिम पास मिलाएका थिए । मुनिरले १८ औं मिनेटमा आकर्षक फिनिस गर्दै बार्सिलोनालाई अग्रता दिलाए ।
बार्सिलोनाको दोस्रो गोलमा पनि राकीटिचकै असिस्ट रहयो । २६ औं मिनेटमा उनले दिएको पासलाई डेनिस सुआरेजले शक्तिशाली प्रहार गर्दै गोलरक्षकलाई बचाउने कुनै मौका दिएनन् । पहिलो हाफ सकिनुअघि नै बार्सिलोना ३–० ले अगाडी भयो । ४३ औं मिनेटमा राकीटिचको क्रसमा माल्कमले हेडरमार्फत गोल गर्दै ३–० को अग्रता दिलाए । दोस्रो हाफमा भने प्रशिक्षक भालभेर्डेले राकीटिचको स्थानमा बुस्केट्सलाई मैदानमा उतारे ।
लिओनेसाले ५४ औं मिनेटमा गोल फर्काउँदै खेलमा फर्कने आशा जगायो । बार्साका गोलरक्षक जास्पर सिलेसनले जोर्गे ओरित्जको लामो प्रहार बचाएपनि रिबाउन्डमा जोसे म्यानुएलले दिएको क्रसमा सेनेले गोल गर्दै अग्रता घटाए । ७० औं मिनेटमा बार्सिलोनाका लागि सुआरेजले पुन गोल गर्दै खेलमा ३ गोलको अग्रता कायम गरे । बार्सिलोनाले पहिलो लेगको खेल १–० ले जितेको थियो । यस नतिजासँगै बार्सिलोना अन्तिम १६ मा प्रवेश गरेको छ । लगातार पाँचौपटक उपाधि जित्ने सुरमा रहेको बार्सिलोनाले अब लिगमा शनिबार एस्पान्योलसँग खेल्नेछ ।
