कालीकोटमा पहिरोले एकै घरका सातको ज्यान लियो, ४ ले भागेर ज्यान जोगाए
पोखरा, साउन १४ । कालीकोट जिल्लामा नरहरीनाथ गाउँपालिका वडा नं ७ मा मंगलबार राति पहिरोले घर पुरेपछि एकै घरका सात जनाको निधन भएको छ ।
स्थानीय गङ्गे बुढाको घर पुरिँदा उनीलगायत ११ जना घर परिवारमध्ये सात जना घरभित्रै पुरिएको प्रहरीले जनाएको छ । जिल्ला प्रहरी कार्यालय कालीकोटका सूचना अधिकृत यक्षराज जोशीले दिनुभएको जानकारी अनुसार सात जनाको पुरिएको अवस्थामा शव निकालिएको छ।
घरभित्र पुरिएर मृत्यु हुनेहरूमा घरमुली वर्ष ६५ का गङ्गे बुढा, उहाँकी श्रीमती वर्ष ६१ की नैना बुढा, बुहारी वर्ष २४ की कुसा बुढा, वर्ष १० की नातिनी चन्द्रीका बुढा, उहाँका दुई नाति वर्ष चारका राम बुढा र ढेड वर्षका चरित्र बुढा र छोरी बिमला बुढा रहेका छन् । छोरीलाई घाइते अवस्थामा उद्धार गरिएको भए पनि उपचारका लागि अस्पताल ल्याउँदै गर्दा बाटोमा मृत्यु भएपछि एकै घरका सात जनाको मृत्यु भएको हो । गङ्गे बुढाका चार जना परिवारले भने भागेर ज्यान जोगाएका छन् ।
