रियल म्याड्रिडलाई उपाधिको लागि एक जित आवश्यक
एजेन्सी । स्पानिस ला लिगा अन्तर्गत गएराति भएको खेलमा लिग लिडर रियल मड्रिडले ग्रानडालाई २–१ ले पराजित गरेपछि रियलले दोस्रो स्थानको बार्सिलोनामाथि ४ अंकको अग्रता बनाएको छ । अब रियललाई उपाधि जित्न २ अंक मात्र आवश्यक छ ।
ग्रानडाको मैदानमा रियलले पहिलो हाफमा गरेको दुई गोल नै जितका लागि पर्याप्त रह्यो । रियलका लागि फ्रान्सका फर्लान्ड मेन्डी र करीम बेन्जेमाले गोल गरेका थिए । ग्रानडाका डार्विन माचिसले एकमात्र गोल गरे ।
खेलको दशौं मिनेटमा नै पाहुना टोली रियल म्याड्रिडले अग्रता लिएको थियो । फर्लान्ड मेन्डिले एकल प्रयासमा ६ यार्ड बक्सको बायाँ भागबाट पहिलो बारमा गरेको शक्तिशाली प्रहार गोलमा परिणत भएको थियो । उनले क्यासेमिरोले दिएको पासलाई अगाडी बढाउँदै तीन डिफेन्डरको चुनौती पार गर्दै रियलका लागि पहिलो गोल गरेका थिए । अग्रता लिएको ६ मिनेटमै रियल २–० ले अगाडी बढ्न सफल रह्यो । फरवार्ड करीम बेन्जेमाले पेनाल्टी क्षेत्रको बायाँ भागबाट उत्कृष्ट नियन्त्रणपछि गरेको प्रहार गोल भएको थियो । लुका मोड्रिचको पासलाई बेन्जेमाले अगाडी बढाएर डिफेन्डरलाई छक्याउँदै दोस्रो बारमा गरेको प्रहार गोल भएको थियो ।
खेलको ३६ औँ मिनेटमा डोमिंगो डुआर्टेको हेडरलाई रियलका गोलरक्षक थिबाउट कोर्टुवाले उत्कृष्ट बचाउ गरे । ४३ औँ मिनेटमा मोड्रिचको पासमा बेन्जेमाको प्रहारलाई गोलरक्षक रुई सिल्भाले बचाए । दोस्रो हाफको ५ मिनेटमै घरेलु टोली ग्रानडाले गोल फर्काउँदै खेलमा फर्किएको संकेत दियो । यंगल हरेराको पासमा माचिसले गोल गर्दै रियलको अग्रता कम गरेका थिए । माचिसको प्रहार गोलरक्षक कोर्टुवाको खुट्टामा लाग्दै गोलमा परिणत भएको थियो ।
खेलको ५ मिनेट समय बाँकी रहँदा ग्रानडाले खेल बराबरीमा ल्याउने सुवर्ण अवसर सदुपयोग गर्न सकेन । पेनाल्टी क्षेत्रभित्र एन्टोनिनको प्रहारलाई गोलरक्षक कोर्टुवाले बचाए । लगत्तै रामोन अजिजको प्रहार कप्तान सर्जियो रामोसले गोललाइनबाट क्लियर गर्दै रियलको अग्रता जोगाए ।
यस जितसँगै रियलले बार्सिलोनासँग ४ अंकको अग्रता लिएको छ । रियलको ३६ खेलमा ८३ अंक छ भने बार्सिलोनाले ७९ अंक बनाएको छ । रियलले अब अर्को खेलमा अलाभेसलाई पराजित गरे उपाधि पक्का गर्नेछ । रियलले अब बाँकी २ मध्ये एक खेल जितेमा उपाधि जित्नेछ ।
यदि बार्सिलोना अबको लमा ओसासुनासंऊ पराजित भएमा रियलले बाँकी २ खेलअघि नै उपाधि जित्नेछ ।
