“सम्पुर्ण जीवन मेरो प्रभु तपाईकै हो” लगायत दर्जनौँ भजनका रचयिता जोन डि. खवास सम्मानित
काठमाडौँ । विश्वभरी रहेका नेपाली ख्रीष्टियान विश्वास बोकेका पत्रकारहरुको भेला अन्तराष्ट्रिय नेपाली ख्रीष्टियान मिडिया समिट कार्यक्रमको दौरानमा दर्जनौँ नेपाली ख्रीष्टियान भजनका रचयिता, संगितकार तथा गायक जोन.डि खवास सम्मानित हुनुभएको छ ।
सम्पुर्ण जीवन मेरो, आज भरे भोली भन्दै जीवन यहाँ अस्ताउँछ, हिजोको दिन बितिगयो, तोडफोड गरी जोड्नुहोस फेरि, म हुँ एउटा रित्तो भाँडो, हृदयको मेरो राजा येशूलाई, प्रभुजी तिमीलाई के चढाउँ, आहा कति रमाइलो खुसीको दिन आयो, सत्य सुन्दर, सिद्ध मानिस, जीवनको यात्रामा डोर्याउनुहोस, आउँदछु तपाईको चरणमा लगायत कयौँ गीतहरुका रचयिता जीवनको यात्रा नामक युटुव च्यानलको पहल तथा संयोजकत्वमा सम्मानित हुनुभएको हो । उहाँलाई नगद रु एक लाख साठी हजार, सम्मान पत्र तथा दोसल्ला ओढाई सम्मान प्रकट गरिएको थियो । सम्मानको क्रममा पा.याम सिवाद्वारा निर्मित उहाँको सांगितिक तथा प्रभुसँगको जीवनको यात्रालाई समेत भिडियोमा प्रदर्शन गरियो । कार्यक्रममा नेपाली ख्रीष्टियान जगतका बहुचर्चित गायक एड्रिन देवानले जोन.डि खवासकै सम्पुर्ण जीवन मेरो प्रभु तपाईकै हो नामक भजन गाएर थप सम्मान प्रकट गर्नुभएको थियो ।
