रियलको मैदानमा बार्सिलोनाको सानदार जित
एजेन्सी – रियल म्याड्रिडको घरेलु मैदान सान्टियागो बर्नाबाउमा सानदार जित दर्ता गर्दै बार्सिलोनाले स्पेनिस कोपा डेल रेको फाइनलमा पुुगेको छ । बुधबार भएको दोस्रो लेगमा लुइस सुआरेजको दुई गोलमा बार्सिलोनाले ३–० को जित दर्ता गरेको हो । यससँगै समग्रमा बार्सिलोना ४–१ को जितसँगै प्रतियोगिताको उपाधि भिडन्तमा पुगेको छ । यसअघि क्याम्प नोउमा भएको पहिलो लेगको खेल १–१ को बराबरीमा टुंगिएको थियो ।
खेलको ५० औं मिनेटमा लुइस सुआरेजले गोल गर्दै बार्सिलोनालाई अग्रता दिलाए । ६९ औं मिनेटमा राफेल भारानेले आत्मघाती गोल गरेपछि बार्सिलोनाको अग्रता दोब्बर भएको थियो । नेल्सन सेमेडोको क्रस सुआरेजसम्म पुग्नु अघि भारानेले क्लियर गर्न खोज्दा आफ्नै पोस्टमा छिरेको थियो । खेलको ७३ औं मिनेटमा बार्सिलोनाले अग्रता बढाउने मौका पायो । क्यासेमिरोले सुआरेजलाई पेनाल्टी क्षेत्रभित्र लडाएपछि प्राप्त पेनाल्टीमा सुआरेजले सहजै गोल गरे । थप समयमा गोल हुन नसक्दा बार्सिलोना फाइनल प्रवेश गर्न सफल रहयो । बार्सिलोनाले यस जितसँगै लगातार छैटौंपटक फाइनल यात्रा तय गरेको छ । लगातार चार सिजन उपाधि जित्दै आएको बार्सिलोना लगातार पाँचौ उपाधि जित्ने दाउमा छ । फाइनलमा बार्सिलोनाले भ्यालेन्सिया र रियल बेटिसको खेलको विजेतासँग खेल्नेछ ।
