डर्टमुन्डमाथि टोटेनहमको सानदार जित
एजेन्सी – यूईएफए च्याम्पियन्स लिग अन्तर्गत राउण्ड अफ १६ को पहिलो लेगमा बुधबार इंग्लिस क्लब टोटेनहम हट्स्परले बोरुसिया डर्टमुन्डलाई ३(० ले पराजित गरेको छ ।
निकै प्रतिस्पर्धात्मक खेलको पहिलो हाफमा पाहुना टोली डर्टमुन्डले केहि दबाब सिर्जना गरेपनि पाएको अवसर सदुपयोग गर्न सकेन । टोटेनहमले पहिलो हाफमा अपेक्षित प्रदर्शन गर्न सकेको थिएन । पहिलो हाफ गोलरहित बराबरीमा सकिएपछि दोस्रो हाफमा भने टोटेनहमले खेलमा बलियो पकड बनायो । दोस्रो हाफको सुरुवाती समयमै दक्षिण कोरियाली फरवार्ड ह्युङ मिन सनले गोल गरे । उनले जान भर्टोन्घनको क्रसमा उत्कृष्ट हाफ भलिमा गोल गरेका थिए । ८३ औं मिनेटमा भर्टोन्घन आफैंले गोल गरे । उनले सर्ज औरियरको क्रसलाई पहिलो टचमा नै गोलको दिशा देखाएका थिए ।
खेलको ४ मिनेट समय बाँकी रहँदा वेम्बलीमा घरेलु टोलीले तेस्रो गोल थप्यो । क्रिस्टियन एरिक्सनको कर्नरमा वैकल्पिक खेलाडी फर्नान्डो लोरेन्टेले गोल गर्दै टोटेनहमको जित सुनिश्चित गरे । दोस्रो लेगको खेल डर्टमुन्डको घरेलु मैदानमा ५ मार्चमा हुनेछ ।
