कोरोना भाइरसबाट निको हुने बढे, एक हजार ९६ जना सङ्क्रमित थपिए
पोखरा, मङ्सिर २१ गते । स्वास्थ्य तथा जनसंख्या मन्त्रालयका अनुसार नेपालमा कोरोना भाइरसका एक हजार ९६ जना सङ्क्रमित थपिएका छन् । थपिएका सङ्क्रमितसँगै नेपालमा कुल सङ्क्रमितको संख्या दुई लाख ४० हजार ९८१ पुगेको छ ।
पछिल्लो २४ घण्टामा आठहजार तीनसय जनाको आरटी पीसीआर नमूनाको परीक्षण गरिएको छ ।
हाल १३ हजार ५८२ जनामा भाइरसको सङ्क्रमण सक्रिय छ । हालसम्म १७ लाख ८४ हजार ५१९ जनाको पीसीआर परीक्षण गरिएको छ ।
मन्त्रालयका अनुसार पछिल्लो चौबीस घण्टामा एक हजार ७५२ जना सङ्क्रमित निको भएका छन् । हालसम्म दुई लाख २५ हजार ८०५ जना सङ्क्रमित निको भइसकेका छन् । मन्त्रालयले पछिल्लो चौबीस घण्टामा १७ जना सङ्क्रमितको मृत्यु भएको उल्लेख गरेको छ । कोरोना भाइरसबाट ९३.७ प्रतिशत निको भएका छन् ।
हालसम्म नेपालमा कोरोना सङ्क्रमणबाट एक हजार ५९४ जनाको मृत्यु भएको मन्त्रालयले जनाएको छ । मन्त्रालयले हाल ५३६ जना क्वारेन्टिनमा रहेको जनाएको छ ।
