हिगुआइन र हाजार्डको गोलमा चेल्सीको शानदार जित

एजेन्सी – एक साताअघि मात्रै इटालियन क्लब युभेन्टसबाट लोनमा चेल्सी आएका अर्जेन्टिनी फरवार्ड गोन्जालो हिगुआइन र इडेन हाजार्डको समान २–२ गोलको मद्दतमा चेल्सीले हडर्सफिल्डमाथि ५–० को शानदार जित निकालेको छ । प्रिमियर लिग अन्तरगत शनिबार भएको खेलमा चेल्सीले घरेलु मैदानमा फराकिलो जित निकालेको हो । ‘डेब्यु’ खेलमा गोल गर्न असफल रहेको हिगुआइनले दोस्रो खेलमा आफ्नो प्रभाव जमायो । १६औं मिनेटमा एङ्गोलो कान्टेको पासमा हिगुआइनले चेल्सीका लागि पहिलो गोल गरे । पहिलो हाफको इन्ज्युरी समयको थप गरिएको पहिलो मिनेटमा हाजार्डले पेनाल्टीमार्फत गोल गरेपछि चेल्सीले पहिलो हाफमा २–० को अग्रता बनायो ।
६६औं मिनेटमा रोज बार्कलीको पासमा हाजार्डले व्यक्तिगत दोस्रो तथा टिमका लागि तेस्रो गोल गर्दै चेल्सीलाई ३–० ले अघि बढाए । त्यसको तीन मिनेटपछि हिगुआइनले व्यक्तिगत दोस्रो तथा टिमको लागि चौथो गोल गर्दै चेल्सीलाई ४–० को फराकिलो जिततर्फ डोर्याए । ८६औं मिनेटमा विलियनको कर्नरमा डेभिड लुइजले हेडमार्फत गोल गर्दै चेल्सीलाई ५–० को शानदार जित दिलाए । हडर्सफिल्डविरुद्ध २ गोल गरेसँगै हिगुआइन प्रिमियर लिगमा घरेलु मैदानमा डेब्यु गोल गर्ने खेलाडी बनेका छन् । यसअघि चेल्सीका मारियो स्टानिकले २००० मा वेस्टह्यामविरुद्ध घरेलु मैदानमा डेब्युमा दुई गोल गरेका थिए । हडर्सफिल्डमाथिको जितसँगै चेल्सी २५ खेलबाट ५० अंक जोडेर लिगको चौथो स्थानमा उक्लिएको छ । चेल्सीले एक खेल कम खेलेको आर्सनललाई ३ अंकले पछि पारेको हो । हडर्सफिल्ड ११ अंक जोडेर पुछारमा छ ।
प्रिमियर लिगका अन्य खेलका नतिजाहरु
टोटनहम विरुद्ध न्यु क्यासल (१–०)
ब्राइटन विरुद्ध वाटफोर्ड (०–०)
बर्नली विरुद्ध साउथह्याम्पटन (१–१)
क्रिस्टल प्यालेस विरुद्ध फुलहम (२–०)
एभर्टन विरुद्ध वल्भ्स (१–३)