प्रधानमन्त्री ओलीद्वारा गण्डकी प्रशिक्षक प्रतिष्ठान शिलान्यास

पोखरा, फागुन १७ गते । प्रधानमन्त्री केपी शर्मा ओलीले गण्डकी प्रशिक्षण प्रतिष्ठान भवनको शिलान्यास गर्नुभएको छ । पोखराको नदीपुर स्थित प्रदेश सभा भवनको परिसरको खाली जग्गामा बन्न लागेको गण्डकी प्रदेश प्रतिष्ठानको भवन प्रधानमन्त्री वलीले शिलान्यास गर्नुभएको हो ।
३३ करोड २१ लाख ५५ हजार रुपैयाँ लागत अनुमान गरिएको प्रतिष्ठानको भवन चारतले हुने छ । भवन निर्माणका लागि यो वर्ष साढे ६ लाख रुपैयाँमात्र विनियोजन गरिएको छ । प्रदेशको भौतिक पूर्वाधार विकास मन्त्रालयले निर्माण कार्यान्वयन गर्ने छ । प्रदेश सरकारले डेढ करोड रुपैयाँ विनियोजन गरेको छ भने प्रदेश तथा स्थानीय सहयोग कार्यक्रमअन्तर्गत प्राप्त ससर्त अनुदान ५ करोड रुपैयाँ यो वर्ष भवनका लागि छुट्टयाइएको हो ।
४ हजार ९ सय ६४ वर्गमिटर क्षेत्रफलमा बन्न लागेको भवनमा व्यवस्थित पार्किङ, मल्टिपल मिटिङ हल, क्लास रुम, डाइनिङ हलसहित ३३ कोठा हुने छन् । भवनको डिजाइन स्केल आर्किटेक्ट प्रालिले गरेको हो ।
प्रदेश र स्थानीय तहमा कार्यरत कर्मचारी एवं जनप्रतिनिधिको क्षमता विकास र कार्यसम्पादनमा सुधार, प्रदेश सरकारका कार्यक्रम कार्यान्वयनमा सहजीकरण गर्ने काम प्रतिष्ठानले गर्दै आएको छ । तत्कालीन नगर प्रशिक्षण केन्द्र भएकै ठाउँमा प्रदेश प्रशिक्षण प्रतिष्ठानको रुपमा विकास गरिएको हो । प्रदेश सरकारले प्रतिष्ठानको ०७५ फागुनमा ऐन बनाएको थियो त्यसको १ वर्षपछि ०७६ फागुन २८ गते प्रतिष्ठानको कार्यकारी निर्देशकमा ऋषिराम पाण्डेलाई नियुक्त गरिएको थियो । प्रदेश अन्तर्गतका सरकारी तथा अर्धसरकारी निकाय र स्थानीय तहको संस्थागत सुधार एवम् शासकीय क्षमताको अभिवृद्धि गर्ने अभिप्रायले प्रतिष्ठान स्थापना भएको हो ।
पार्टीका अगुवाहरुको भेलालाई सम्बोधन गर्न आउनुभएको प्रधानमन्त्री उद्घाटन कार्यक्रममा सहभागी हुनुभएको हो । शिलान्यासपछि बोल्दै उहाँले अबको सरकारले केही गरेर देखाउने कुरा विश्वस्त गराउनुभयो ।