ला लिगाः मेस्सी र सेमेडोको गोलमा बार्सिलोना विजयी
एजेन्सी –कप्तान लियोनल मेस्सी र नेल्सन सेमेडोले गोल गरेपछि स्पेनिस ला लिगामा बार्सिलोनाले जिरोनामाथि सहज जित हात पारेको छ । आइतबार राति भएको खेलमा बार्सिलोनाले १० खेलाडीमा सिमित जिरोनालाई २–० गोलले हरायो ।
जिरोनाको घरेलु मैदानमा खेलिएको खेलमा बार्सिलोनाले नवौं मिनेटमा खाता खोलेको थियो । सेमेडोले इभान राकिटिकको पासमा गोलगर्दै बार्सालाई अगाडी बढाए । खेलको ५१औं मिनेटमा बर्नान्डो इस्पिनोसा दोहोरो पंहेलो (रातो) कार्ड पाउँदै बाहिरिएपछि जिरोना १० खेलाडीमा समेटिएको थियो । बार्सिलोनाले त्यसलगत्यै फाइदा उठाएको थियो । ६८औं मिनेटमा गोल गर्दै मेस्सीले बार्सिलोनाको अग्रता दोब्बर बनाए । जितसँगै बार्सिलोनाले शीर्षस्थानमा पाँच अंकको अग्रता बनाएको छ । बार्सिलोनाको २१ खेलबाट ४९ अंक पुगेको छ । बार्सिलोनालाई पछ्याइरहेको एट्लेटिको म्यड्रिडको ४४ अंक रहेको छ । जिरोना २४ अंक सहित १३औं स्थानमा छ । ला लिगाकै अर्को खेलमा रियल म्यड्रिडले स्पान्योललाई ४–२ गोलले हरायो । जितसँगै ३९ अंक बनाएको रियल तेस्रो स्थानमा उक्लिएको छ । २४ अंक बनाएको स्पान्योल १४औं स्थानमा छ । अन्य खेलमा एथ्लेटिक बिल्बाओले रियल बेटिसलाई १–० तथा रियल भालाडोलिडले सेल्टा भिगोलाई २–१ गेलले हरायो । रियल सोसिएडाड र हुयस्काले गोलरहित बराबरी खेल्दै अंक बाँडे ।
