नेपाल लिटरेचर फेस्टिबलको ओपनिङ सराङकोटबाट आज हुँदै
पोखरा, पुष १३ गते । नेपाल लिटरेचर फेस्टिभलको “सफ्ट ओपनिङ” आज साँझ ५ बजे हुँदैछ । शुभारम्भ साँझ नाम दिइएको यस कार्यक्रममा गजल महफिल जम्नेछ । जसमा प्रस्तोता अमृत सुवेदीकासाथ जल्दाबल्दा गजलकार प्रदीप रोदनले आफ्ना रचना सुनाउनेछन् ।
पेशाले शिक्षक गोर्खाका स्रष्टा रोदन पछिल्लो समय चर्चामा आएका गजलकार हुन् । “डाक्टर साब चामल बेचेर जँचाउन आएको हुँ, बिन्ती मलाई खाली पेटमा खाने दबाई दिनुहोस्” अत्यधिक रुचाइएको गजल हो ।
यस्तै दमदार गजलले साँझको महफिल जम्ने, जमाउने योजना रहेको प्रस्तोता सुवेदीले जनाएका छन् । कोरोना कहरकाकारण फेवा किनारबाट सराङकोटतर्फ उक्लिएको फेस्टिभलको औपचारिक उद्घाटन भने मंगलबार हुनेछ । १४ र १५ गते हुने फेस्टिभलको यो संस्करणमा १६ सेसन र ४० जनाभन्दा बढी वक्ता रहनेछन् । सबै सत्र भर्चुअल रूपमा गरिने भएकाले यस पटक दर्शकको उपस्थिति भने रहने छैन । फेस्टिभलका सबै सत्र सामाजिक सञ्जाल एवम् फेस्टिभलको आधिकारिक युट्युब च्यानलबाट लाइभ प्रसारण हुनेछन् ।
नवौं संस्करणको फेस्टिभलमा साहित्यकार, लेखक, पत्रकार, कलाकार र विशिष्ट व्यक्तित्व वक्ताका रूपमा रहनेछन् ।
