जापान विश्वकपमा दक्षिण अमेरिकी टोलीलाई हराउने पहिलो एसियाली देश बन्यो

असार ६, २०७५
विश्वकप २०१८ को समूह एच अन्तरगतको खेलमा कोलम्बियालाई जापानले २–१ ले हराएको छ । यसका साथै विश्वकप इतिहासमा दक्षिण अमेरिकी राष्ट्रलाई हराउने जापान पहिलो एसियाली देश बनेको छ ।
विश्वकपका विभिन्न संस्करणमा एसियाली देशहरुको दक्षिण अमेरिकी देशसँग १७ पटक भेट भएको छ । तर यसअघि कुनै पनि एसियाली टिमले दक्षिण अमेरिकी राष्ट्रलाई हराउन सकेको थिएन । यति मात्र होइन, जापानले अघिल्लो विश्वकपमा कोलम्बियासँग भोगेको हारको बदला समेत लिएको छ । अघिल्लो संस्करणमा जापान ४–१ ले पराजित भएको थियो ।
जापानविरुद्धको खेलमा जापानी खेलाडी सिन्जी कागावाको प्रहारलाई हातले रोकेपछि जापानले पेनाल्टी पाएको थियो ।
म्यानचेस्टर युनाइटेडका पूर्व खेलाडीसमेत रहेका जापानी खेलाडी शिन्जी कागावाले पेनाल्टीमाफर्त गोल गर्दै सुरुमै जापानलाई १–० को अग्रता दिलाए ।
डिबक्सभित्र हातले बल रोकेपछि कोलम्बियाका खेलाडी कालोर्स सान्चेज रेड कार्ड खाँदै मैदानबाट बाहिरिए ।सान्चेज विश्वकप २०१८ मा रेड कार्ड पाउने पहिलो खेलाडी पनि भएका छन् ।
स्टार खेलाडी जेम्स रोड्रिग्वेज चोटिल भएपछि त्यसै नै दबाबमा रहेको कोलम्बिया १० खेलाडीमा सीमित भएपछि अझ दबाबमा थियो । तर १० खेलाडीमा सीमित भए पनि कोलम्बियाले जापानमाथि निरन्तर दबाब बनाइराख्यो । खेलको ३७ औँ मिनेटमा डिबक्सबाहिर जापानी खेलाडी माहोतो हासेबेले कोलम्बियाली खेलाडी राडामेल फाल्काओलाई लडाएपछि कोलम्बियाले फ्रिकिक पायो । जुवान क्विन्टेरोले फ्रिकिकमार्फत गोल गर्दै १–१ को बराबरी गरे ।
खेलको ५९ औँ मिनेटमा कोलम्बियाले क्विन्टेरोको स्थानमा रोड्रिग्वेजलाई मैदानमा प्रवेश गरायो । तर खेलको ७३ औँ मिनेटमा जापानका लागि युया ओसाकोले केइसुके होन्डाले प्रहार गरेको कर्नरमा हेडमार्फत सुन्दर गोल गर्दै २–१ को जित सुनिश्चित गरे ।

इजिप्टलाई हरायो रुसले

विश्वकप फुटबलमा आयोजक रुस समूह चरणको आफ्नो अर्को खेलमा विजयी हुँदै दोस्रो चरण नजिक पुगेको छ । इजिप्टमाथि उसले हासिल गरेको ३–१ को जितलाई सेन्ट पिटर्सबर्ग्स्थित रंगशाला र रुसभरि हर्षोल्लासले स्वागत गरिएको थियो।
यसअघिको आफ्नो पहिलो खेलमा रुसले साउदी अरेबियालाई ५–० ले हराएको थियो ।

मोहम्मद सलाहको टोली इजिप्टले रुसी खेलाडीले टाउकोले हानेको बल रोक्ने प्रयासमा ४७ औँ मिनेटमा आत्मघाती गोल खाएको थियो । काँधमा चोट लागेका सलाह पहिलो पटक मंगलवारको खेलमा सहभागी थिए । उनले पेनाल्टीमार्फत एक गोल हाने पनि त्यो सान्त्वना गोल मात्रै बन्न पुग्यो ।
अब बुधवार हुने खेलमा साउदी अरेबियाले युरुग्वेलाई पराजित गर्न सकेन भने रुस दोस्रो चरणमा प्रवेश गर्नेछ भने इजिप्ट प्रतियोगिताबाट बाहिरिनेछ ।

त्यसैगरी मंगलवार आफ्नो प्रतिद्वन्द्वी टोलीलाई हराउँदै सेनेगल यो विश्वकपको समूह चरणको पहिलो खेल जित्ने पहिलो अफ्रिकी देश बनेको थियो । अरू चार अफ्रिकी टोलीहरूले यो विश्वकपमा खेलेका आफ्ना पहिलो खेलमा पराजय बेहोरेका छन् । उसले पोल्याण्डमाथि २–१ को जित हासिल ग¥यो
अपेक्षा अनुसार पोल्याण्डले खेल्न नसेकेको भनेर टिप्पणी भएको उक्त खेलमा सेनेगलले गरेको दोस्रो गोल भने विवादास्पद बनेको थियो ।
पोल्याण्डविरुद्ध उक्त टोलीका खेलाडीहरूले शारीरिक र रणनीतिक रूपमा उत्कृष्ट खेल प्रदर्शन गरेको टिप्पणी भइरहेका छन् ।