कप्तान मेस्सीको पेनाल्टीमा अर्जेन्टिनाको जित
एजेन्सी – विश्वकप छनोटको पहिलो खेलमा कप्तान लियोनेल मेस्सीले पेनाल्टी गोल गरेसँगै सँगै अर्जेन्टिनाले विजयी सुरुवात गरेको छ । अर्जेन्टिनाले इक्वेडरलाई १–० ले पराजित गरेको हो ।
खेलको १३ औँ मिनेटमा मेस्सीले पेनाल्टीमा गोल गर्दै अग्रता दिलाएका थिए । इक्वेडरका पेर्भीस इस्टुनपियनले लुकास ओकाम्पसलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । २० औँ मिनेटमा लौटारो मार्टिनेजको पासमा मेस्सीको प्रहार डिफ्लेक्ट हुँदै बाहिरियो ।
दोस्रो हाफको ४८औँ मिनेटमा मार्टिनेजको पासमा ओकाम्पसको प्रहार गोलरक्षक एलेक्जेन्डर डोमिन्गेजले बचाए । ७३ अौं मिनेटमा मेस्सीको क्रसमा एडुआर्डो साल्भियोको हेडर पोस्टभन्दा बाहिरियो । इन्ज्युरी समयको चौथो मिनेटमा रोड्रिगो डे पल चुक्दा अर्जेन्टिना १–० मै चित्त बुझाउन बाध्य भयो ।
विश्वकप छनोट अन्तर्गत अर्को खेलमा पाराग्वे र पेरुले २-२ को बराबरी खेले । उरुग्वेले चिलीलाई २–१ ले पराजित गर्यो । उरुग्वेको जितमा लुइस सुआरेज र म्याक्सी गोमेजले १–१ गोल गरे ।
