थप ७०७ जना सङ्क्रमित, कुल २९ हजार ६४५ पुग्यो
पोखरा, भदौ ४। पछिल्लो २४ घण्टामा नेपालमा कोरोना भाइरसका ७०७ जना सङ्क्रमित भेटिएका छन् । थपिएका सङ्क्रमितसँगै नेपालमा कुल सङ्क्रमितको सङ्ख्या २९ हजार ६४५ पुगेको छ । स्वास्थ्य तथा जनसङ्ख्या मन्त्रालयले पछिल्लो चौबीस घण्टामा १९२ महिला र ५१५ जना पुरूषको कोरोना पुष्टि भएको जानकारी दिएको छ ।
नेपालमा अहिले सक्रिय सङ्क्रमितहरू एघार हजार ५५५ रहेका छन् । क्वारेन्टिनमा ११ हजार ७६८ रहेका छन् । त्यसैगरी आज बिहीबार देशका विभिन्न जिल्लामा रहेका अस्पतालबाट २६४ जना सङ्क्रमित निको भएर घर फर्किएका छन् । योसँगै हालसम्म १७ हजार ७६८ जना सङ्क्रमित निको भएर घर फर्किएका छन् ।संस्थागत आइसोलेसनमा ८ हजार ८३ र होम आइसोलेसनमा ३ हजार ७७३ रहेका छन् ।
कोरोना भाइरसका कारण बिहीबार थप छजनाको मृत्यु भएको छ । योसँग नेपालमा कोरोनाका कारण मृत्यु हुनेको सङ्ख्या १२६ पुगेको छ ।
