च्याम्पियन्स लिगःएट्लेटिको म्याड्रिडले युभेन्टसलाई हरायो

एजेन्सी । यूईएफए च्याम्पियन्स लिग अन्तर्गत एटलेटिको म्याड्रिड र युभेन्टसबीच भएको राउन्ड अफ १६ को पहिलो लेगमा एट्लेटिको म्याड्रिडले युभेन्टसलाई २–० ले पराजित गरेको छ । एट्लेटिको म्याड्रिडको घरेलु मैदानमा भएको खेलमा युभेन्टसले बलमा पकड बनाउँदै सुरुवाती अवसर सिर्जना गरेपनि त्यसलाई सदुपयोग गर्न नसक्दा हार बेहोरेको हो । गोलरहित सकिएको पहिलो हाफ पछी एट्लेटिकोले दोस्रो हाफमा दुवै गोल गरेको थियो ।
खेलको ७८ औँ मिनेटमा जोसे जिमिनेजले घरेलु टोलीलाई अग्रता दिलाए । त्यसको ५ मिनेटमा नै कप्तान डिएगो गोडिनले गोल गर्दै अग्रता दोब्बर पारे । उनको प्रहार रोनाल्डोलाई लाग्दै गोलमा परिणत भएको थियो । त्यसअघि अल्भारो मोराटले खेल बराबरीमा रहँदा गरेको गोेल भिडियो असिस्टेन्ट रेफ्रीले मान्यता दिएको थिएन । यस नतिजासँगै एटलेटिकोले घरेलु मैदानमा यूईएफए च्याम्पियन्स लिगको नकआउट खेलमा अपराजित यात्रा कायमै राखेको छ ‌। युभेन्टसले एटलेटिकोविरुद्ध च्याम्पियन्स लिगको खेलमा गोल गर्न सकेको छैन । दोस्रो लेग मार्च १२ मा युभेन्टसको घरेलु मैदानमा हुनेछ ।