बार्सिलोना बराबरीमा रोकियो
एजेन्सी – बार्सिलोनाका कप्तान लिओनेल मेसी सुरुवाती रोजाईमा फर्किएको खेलमा एथलेटिक बिल्बाओले आफ्नो घरेलु मैदान सान मामेसमा बार्सिलोनालाई गोलरहित बराबरीमा रोकेको छ । लगातार तेस्रो खेल बराबरी खेलेको बार्सिलोनाले यससँगै शीर्ष स्थानमा अग्रता बढाउने मौका पनि गुमाएको छ । बुधबार कोपा डेल रे अन्तर्गत रियल म्याड्रिडविरुद्ध १–१ को बराबरीमा बेन्चबाट मैदान छिरेका मेसी बिल्बाओविरुद्ध भने सुरुवाती रोजाइमा थिए । तर उनले अपेक्षित नतिजा निकाल्न भने सकेनन् ।
मिडफिल्डमा घाइते भएका आर्थरको कमीलाई अर्का मिडफिल्डर आर्टुरो भिडालले पूरा गर्न सकेनन् । दोस्रो हाफमा बार्सिलोनाले मौका पाएपनि सदुपयोग गर्न नसक्दा जित दर्ता गर्न सकेन । यससँगै बार्सिलोनालाई लयमा फर्किएको रियल म्याड्रिडले प्रत्यक्ष दबाब दिन सक्ने देखिएको छ ।
बार्सिलोनाको २३ खेलमा ५१ अंक छ । रियल म्याड्रिडले समान खेलमा ४५ अंक जोडेको छ भने एटलेटिकोको ४४ अंक रहेको छ । बार्सिलोनाले लिग अन्तर्गत शनिबार घरेलु मैदानमा रियल भालाडोलीडको सामना गर्नेछ ।
