च्याम्पियन्स लिग :साल्केमाथि म्यान्चेस्टर सिटीको जित

अन्तराष्ट्रीय खबर खेलकुद

एजेन्सी। इंग्लिस क्लब म्यान्चेस्टर सिटीले च्याम्पियन्स लिग फुटबलअन्तर्गत प्रिक्वारटफाइनलको पहिलो लेगमा जित हात पारेको छ । बुधबार राति भएको खेलमा जर्मन क्लब एफसी साल्केलाई उसैको घरेलु मैदानमा सिटीले ३–२ गोलअन्तरले पराजित गरेको हो । १० खेलाडीमा सिमित सिटीले उत्कृष्ट पुनरागमन गर्दै जित हात पारेको हो ।
सिटीको जितमा सर्जियो अगुएरो, लेरो साने र रहिम स्टर्लिङले गोल गरे । यता, साल्केका लागि नबिल बेन्टालेबले दुई गोल गरे । खेलको १८औं मिनेटमा नै अगुएरोले गोल गर्दै सिटीलाई सुरुवाती अग्रता दिलाएका थिए । तर खेलको ३८औं मिनेटमा साल्केले पेनाल्टी पायो । नबिलले पेनाल्टीबाट गोल गर्दै १–१ गोलको बराबरीमा ल्याएका थिए । ४५औं मिनेटमा साल्केले फेरी पेनाल्टी पायो । यो पटक पनि नबिलले नै पेनाल्टी प्रहार गर्दै गोल गरेपछि साल्केले पहिलो हाफसम्म २–१ गोलको अग्रता बनाएको थियो ।

निकोलस ओटामेन्डी खेलको ६८औं मिनेटमा डबल पहेँलो कार्डसँगै रेड कार्ड खाँदै मैदानबाट बाहिरिएपछि सिटी १० खेलाडीमा सिमित भएको थियो । तर यसपछि भने सिटीले उत्कृष्ट प्रदर्शन गर्दै दुई गोल थप्न सफल भयो । ८५औं मिनेटमा सानेले गोल गर्दै सिटीलाई २–२ गोलको बराबरीमा ल्याएका थिए । खेलको अन्तिम मिनेट अर्थात ९०औं मिनेटमा स्टर्लिङले गोल गर्दै सिटीलाई ३–२ गोलको जित दिलाए ।

Leave a Reply

Your email address will not be published. Required fields are marked *